Kulturkroniko

La pola Senato anoncis novan patronon de la 2023-a jaro. Temas pri elstara pola pentristo, Jan Matejko. Venontjare pasos lia 185-a naskiĝdatreveno kaj la 130-a datreveno de la morto. En la rilata proklamdokumento la polaj senatanoj memorigas, ke Jan Matejko konsekvence realigis sian artmision kaj civitanan servon al la nacio. Liaj pentraĵoj bildigis la kaŭzojn de la falo de la 1-a Respubliko (la dispartigo de ĝia teritorio) kaj enhavis aludojn al la fierinda pasinteco de Pollando kaj ĝia potenco. Ili konsciigadis al poloj senigitaj je la ŝtata suverenco la valoron de la kultura heredaĵo. Jan Matejko akiris famon pro siaj multaj historitemaj tolaĵoj. Li aŭtoris krome milojn da desegnaĵoj kaj akvarelaĵoj. La eldonita en 1860 artverko „Vestaĵoj en Pollando” prezentas la polajn historiajn kostumojn ekde la 1200-a jaro ĝis 1795. Vaste konata estas ankaŭ lia „Galerio de la polaj reĝoj kaj princoj”, kiun li finis en 1892. Jan Matejko interesiĝis ankaŭ pri la konservado de historiaj objektoj de Krakovo. Li partoprenis laborojn de la artkonservistaj komisionoj respondecaj pro la restaŭro de la krakovaj Draphaloj kaj Maria-preĥejo. Por ĉi-lasta en la jaroj 1889-1891 li projektis polikromiaĵojn, kalkulatajn al la plej elstaraj verkoj de la pola monumenteca pentroarto.

El la elsendo 10.12.2022. Legas Milada – 02′ 10″

La 2023-a estis deklarita de la Pola Senato kiel Jaro de Wisława Szymborska, lige kun ŝia 100-a naskiĝdatreveno pasonta tiujare. En la rilata rezolucio estis substrekite, ke Wisława Szymborska estas unu el la plej konataj polaj poetinoj, unu el malmultaj polaj Nobel-premiitinoj. Ŝia kreado vekis viglan interesiĝon ne sole en Pollando, sed ankaŭ eksterlande. La naskiĝinta apud Poznano la 2-an de julio 1923 poetino ekde la 6-a vivojaro loĝis en Krakovo. Dum ŝia vivo aperis 12 poezivolumoj. Postmorte en 2012 aperis aldone nefinita volumo „Sufiĉas”, du jarojn poste estis eldonita „Nigra kanzono”, ŝia debutpoeziaĵo. En 1996 Wisława Szymborska ricevis literaturan Nobel-premionŜiaj poeziaĵoj estis tradukitaj en pli ol 40 lingvojn, inkluzive de Esperanto. La rezolucio de la pola Senato reliefigas krome la felietonistan talenton de Szymborska, kion atestas ŝiaj tekstoj en la literatura kaj ĉiutaga gazetaro aperintaj dum preskaŭ jarcentduono. Dank’ al ŝiaj tradukoj polaj legantoj povis konatiĝi kun kreado de i.a. francaj, germanaj, bulgaraj poetoj kaj poetoj verkantaj en la hebrea lingvo. Wisława Szymborska mortis la 1-an de februaro 2012 en Krakovo. Tiam estis establita, konforme al ŝia deziro, fondaĵo kun ŝia nomo. Ekde 2013 ĝi atribuas la Premion Wisława Szymbrska pro poezia volumo eldonita en la pola lingvo aŭ tradukita en la polan lingvon. La fondaĵo donas ankaŭ financan helpon al verkistoj kaj tradukistoj kun ekonomiaj problemoj kaj atribuas premion al junaj verkistoj, tradukistoj, literaturaj ekspertoj. Ĝia patrono estas Adam Włodek. Ŝia loĝejo en Krakovo laŭ la decido de la fondaĵo estis destinita por literaturista rezidejo. Ekde 2019 ĝian programon utiligis preskaŭ 200 verkistoj.

El la elsendo 30.11.2022. Legas Maciek – 2′ 23″

Interesan iniciaton daŭrigas nunjare la Podlaĥia Operejo kaj Filharmonio el Bjalistoko. Dum specialaj lecjonoj por junularo en la regiono ĝi proksimigas la polan 19-jarcentan komponiston kaj montgripmanton en Tatry-montaro, Mieczysław Karłowicz. La ciklo „Pramalnovaj kantoj. Karłowicz kaj ni” per 40 eksterstersidejaj sesioj planis atinigi 16 eĉ plej malgrandajn lokojn de la vojevodio, kie forestas grandaj kulturinstitucioj. La lecjonojn gvidas artistoj de la Podlaĥia Operejo kaj Filharmonio rakontante pri la kreado kaj silueto de la tro frue mortinta komponisto. Havante 33 tri jarojn li pereis dum la montogrimpado en Tatry-montaro priŝutita de lavango. Mieczysław Karłowicz naskiĝis en 1876. Ekde la 7-a vivojaro li lernis violonludon en Dresdeo kaj Prago, sekve en Varsovio, tie samtempe studante harmonisciencon. Samtempe li studis natursciencojn en Varsovio kaj filozofion en Berlino. Karłowicz apud Frederiko Chopin kaj Karol Szymanowski estas kalkulata al la plej elstaraj komponistoj en la historio de la pola muziko. Liaj komponaĵoj reprezenta malfruan romantikismon.

El la elsendo 30.11.2022. Legas Maciek – 1′ 25″

Mateusz Krzyżowski fariĝis la laŭreato de la 12-a Internacia Pianista Konkurso de Ignacy Jan Paderewski en Bydgoszcz. Li havas 23 jarojn kaj estas studento de la Muzika Universitato de Frederiko Chopin en Varsovio. En 2021 li troviĝis inter la finalanoj de la 18-a Internacia Pianista Konkurso de Frederiko Chopin. La duan lokon en Paderewski-konkurso akiris hispano Pedro Lopez Salas kaj la trian Danylo Saienko el Ukrainio. Distingitaj estis krome Piotr Pawlak el Pollando kaj japanino Shio Okui. Krom monpremioj la laŭreatoj ricevis plurajn specialajn premiojn i.a. en la formo de koncertoj kaj recitaloj en diversaj landoj de la mondo. Mateusz Krzyżowski kaj Piotr Pawlak, kiel la plej bonaj poloj ricevis aldone la premion de la pola ministro por la eŭropuniaj aferoj. Ĝi konsistas el fortepianaj recitaloj kun la muziko de Frederiko Chopin, Igancy Jan Paderewski kaj Karol Szymanowski en la polaj diplomatiaj centroj en Francio, Svislando kaj Usono.

El la elsendo 30.11.2022. Legas Milada – 1′ 34″

Dank’ al la pola kulturministerio de pli ol 10 jaroj dum la tuta novembro la polaj reĝaj rezidejoj disponigas parton de sia ekspozicia oferto senpage. La kvanto de rezidejoj kreskas kun ĉiu jaro. Al la klasikaj, tradiciaj Reĝa Kastelo ĉe Wawel-altaĵo en Krakovo, La Reĝa Łazienki-parko, Muzeo-Palaco de reĝo Johano la 3-a Sobieski kaj la reĝa Kastelo – ĉiuj tri en Varsovio, al la vizitindaj en la lastaj jaroj aldoniĝis muzeoj en la reĝaj rezidejoj en la urboj Sandomierz, Lublin kaj Malbork. Krome la Salkastelo en Wieliczka. Nunjare al la vico de la reĝaj rezidejoj viziteblaj senpage en novembro aldoniĝis la Reĝa Kastelo en Poznań, kasteloj en Kwidzyń kaj Sztum – la filioj de la Kastela Muzeo en Malbork.
La vizito oferto ne limiĝas sole al rigardo de konstantaj kaj porokazaj ekspozicioj, sed krome proponas klerigajn renkontiĝojn, prelegojn, konferencojn, laborrenkontojn kaj muzeajn lecionojn.

El la elsendo 20.11.2022. Legas Barbara kaj Gabi – 01′ 14″

La loĝantoj de Szczecin (la nord-okcidenta Pollando) havis la okazon dum kelkaj tagoj komence de novembro rigardi eksterordinaran donacon, kiun ricevis la loka Nacia Muzeo de privata kolektanto dum 30 jaroj ligita kun Szczecin kaj nun loĝanta en la germana Kolonjo. Ventontjare ĝi estos disponigita kiel ekspozicio al vasta publiko. La kolekto konsistas el preskaŭ 300 malgrandaj objektoj de la azia arto, inluzive de „netsuke”, miniaturaj skulptaĵoj tradicie alpendigataj ĉe la zono de la japana kimono. Utiligataj ekde la 15-a jarcento ili estis tradicie fiksataj al la fino de la ŝnuro, sur kiu estis fiksata al la zono de kimono saketo por etaj objektoj „inro”. Ankaŭ tiuj objektoj troviĝas inter la eksponaĵoj, simile kiel „okimono”, multe pli grandaj figuretoj destinitaj por la ornamo de internoj. La karakterizaĵo de la kolekto estas, ke ĉiuj objektoj estas faritaj el diversspecaj ostoj. Temas pri ostoj elefanta, mamuta, bubala, kamela aŭ rosmara. La kolekto estas tre varia, sed samtempe formas koheran tuton. Inaŭguris ĝin antaŭ jaroj la ebura figureto de Budho ,aĉetita en la vendejo „Orient” en Szczecin.

El la elsendo 20.11.2022. Legas Gabi – 01′ 32″

Dum la lasta semajnfino mi finfine havis la okazon viziti la arkitekture interesan Villa la Fleur, kiu estas privata muzeo establita en 2010. La troviĝanta en la apudvarsovia urbeto Konstancin-Jeziorna artgalerio Villa la Fleur aktuale ĝis la 17a de decembro invitas por la ekspozicio “Tamara Łempicka kaj art déco”. Eblas rigardi en ĝi pli ol 70 artverkojn de la mondfama pola pentristino. La artaĵoj (pentraĵoj, skizoj) devenas el francaj kaj polaj muzeoj, el usonaj privataj kolektoj. Apenaŭ mi alvenis, mi tuj rimarkis amason de personoj atendantaj sian vicon por aĉeti la enirbiletojn, kiujn – bonŝance – mi aĉetis rete kelkajn tagojn antaŭe. Ne mirige, ke la ekspozicio vekas tioman interesiĝon! Ĝi klare montras la talentoevoluon kaj karierovojon de Łempicka, do – krom veki estetikajn travivaĵojn – ĝi sendube havas grandan edukan valoron. Admirindaj estas ŝiaj fruaj akvarelaĵoj, pluraj krokizoj, inter ili tiu por la fama pentraĵo “Memportreto en la verda Bugatti”, apud kiu estas montrita la revuo “Die Dame” el 1929, sur kies kovrilo aperis la fama pentraĵo. La ekspozicio tre detale prezentas la vivon de la pentristino, kies harbuklo, vestaĵoj, ĉapeloj, juvelaĵoj troviĝas en apartaj vitrinoj. Substrekenda estas la aranĝo de la ekspozicio mem, tre bone planita kaj teknike perfekta. Oni zorgis pri detaloj kaj klaraj priskriboj de la eksponaĵoj. Oni ne forgesis pri taŭga prilumo ebliganta allogan prezenton de la unuopaj artaĵoj. Mian atenton kaptis ankaŭ grandega foto prezentanta la internon de la laborejo de Łempicka. Videbliĝas sur ĝi mebloj – la samaj troviĝas tute apude en la ekspozicio! Fakte Marek Roefler – la privata artkolektanto, dank’al kies iniciato Villa la Fleur komencis roli kiel referencopunkto por artamantoj en Pollando – aĉetis ilin en 2020 en Parizo. La kolektanto, en sia privata kolekto havas entute 12 oleopentraĵojn de Łempicka, same kiel ŝiajn desegnaĵojn kaj antaŭmilitajn grafikaĵojn. La kvalito de la ekspozicioj organizitaj en Villa la Fleur estis rekonita en 2020 per la prestiĝa Feliks Jasieński-premio, establita por honori la plej grandan polan kolektanton, kiu en 1920 donacis al la pola nacio proksimume 15000 artaĵojn, inkluzive de elstaraj verkoj de mondaj artistoj.

El la elsendo 20.11.2022. Legas Maciek – 03′ 05″

Lastdimanĉe, t.e. la 6-an de novembro en la Pomeria Filharmonio en Bydgoszcz estis inaŭgurita la 12-a Internacia Pianista Konkurso de Ignacy Jan Paderewski. Partoprenas ĝin 41 artistoj el 13 landoj en la aĝo de 16 ĝis 32 jaroj. Ili estis eliminitaj el inter 150 kandidatoj de 28 landoj. La eliminaj priaŭskultoj okazis en Sacile – Italio, Seulo, Tokio, Varsovio, Vieno kaj Novjorko. La kvaretapan konkursan rivaladon pritaksas la ĵurio sub la gvido de profesoro Piotr Paleczny. En ĝia konsisto troviĝas krome Rafał Blechacz (Pollando), Dang Thai Son (Vjetnamio), Stanislav Ioudenitch (Usono), Vanessa Latarche (Britio), Nikita Mndoyants (Francio), Alberto Nose (Italio), Noriko Ogawa (Japanio) kaj Alicja Paleta-Bugaj (Pollando). Ĉiuj konkursetapoj estas publike relajsataj.
La festivalo estas organizata de la Muzika Societo de Ignacy Jan Paderewski – kiu nunjare solenas sian 100-jaiĝon – kunlabore kun la Muzika Akademio kaj Pomeria Filharmonio en Bydgoszcz. La konkurso omaĝas la memoron de elstara pola pianisto, komponisto kaj politikisto Ignacego Jana Paderewskiego, krome ĝi celas promocii junajn pianistojn kaj polan kulturon en la mondo. La finalo de la konkurso dum kiu estos disdonitaj premioj okazos la 20-an de novembro en la koncerta salonego de la Pomeria Filharmonio de Ignacy Jan Paderewski en Bydgoszcz.

El la elsendo 10.11.2022. Legas Maciek – 01’44”

Lastsemajne finiĝis la 16-a Internacia Violonista Konkurso de Henryk Wieniawski. La ĵurio atribuis tri ĉefajn premiojn kaj tri egalrangajn distingojn. La unuan premion gajnis Hina Maeda el Japanio, la 2-an Meruert Karmenova el Kazaĥio kaj la 3-an Qingzhu Weng el Ĉinio. Distingitaj estis Hana Chang reprezentanta Japanion, Singapuron kaj Usonon, Jane Hyeonjin Cho kaj Dayoon You, ambaŭ el la Suda Koreio. La nunjara konkurso estis rekorda laŭ la vidpunkto de multnombra aliĝo. Por la antaŭelektoj anoncis sin 220 violonistoj el 30 laandoj alsendinte por priaŭskultado po 4 komponaĵoj sen munto kaj sonprilaboro. La kandidatoj ne povis superi la 31-an vivojaron. La ĵurio invitis al la konkurso 41 personojn, sed la konkurson partoprenis 31. La plej juna havis 16 jarojn, la plej aĝa 29. La laŭreatoj de la nunjara konkurseldono jam prezentis la unuajn koncertojn da kiuj estos trideko en Pollando kaj eksterlande. Hina Maeda koncertos kun orkestroj en Eŭropo, en la landoj de Azio, ambaŭ Amerikoj kaj Afriko. La konkurso de Henryk Wieniawski estas la plej malnva kaj unu el la plej pretiĝaj internaciaj violonistaj koncertoj en la mondo. La unua okazis en 1935. Ekde 1952 ĝi estas organizata ĉiun kvinan jaron en Poznano. Inter ĝiaj laŭreatoj estis i.a. Ginette Neveu, Dawid Ojstrach kaj Ida Haendel.

El la elsendo 30.10.2022. Legas Maciek – 1′ 48″

Ekde la komenco de septembro la korea publiko havis la okazon konatiĝi kun riĉa pola kultura programo kunorganizita de Adam Mickiewicz-Instituto. En la muzika oferto temis pri pluraj realtempaj koncertoj kun muziko de Krzysztof Penderecki kaj la porfilma komponado de Wojciech Kilar. Dum Jarasum Jazz Festival estis prezentita la projekto Stańko@80, lige kun la 80-jariĝo de renoma pola ĵazmuzikisto, Tomasz Stańko.  En la eldono de Sori Festival en Jeonju la pola folklora grupo Tęgie Chłopy prezentis dancmuzikon el vilaĝoj de Kielce-regiono kaj la centra Pollando. La tutan programon kronas la ekspozicio „La majstroj de la pola desegnoarto”, kiu daŭras ĝis la 15-a de januaro 2023 en la Biblioteko de Bildolibro en Suncheon. Temas pri la plej granda eksterlanda ekspozicio de la polaj infanlibraj ilustraĵoj, kiu koncernas la verkojn de la plej renomaj polaj ilustristoj de la lasta jarcento, kiel Jan Marcin Szanser. Oni prezentas ankaŭ porinfanajn librojn ilustritajn de nuntemaj polaj desegnistoj. La ekspozicio, kies kuratoro estas Jiwone Lee, pola filologo, arthistoriisto estis kunorganizita de Adam Mickiewicz-Istituto kaj Suncheon Picture Book Library. La pola Adam Mickiewicz-Istituto estas la nacia kulturinstituto, kies celo estas la vekado de interesiĝo pri la pola kulturo en la mondo kunlabore kun elsterlandaj partneroj kaj pere de internacia kultura interŝanĝo. Dum la 22-jara ekzisto ĝi realigis jam pli ol 70 projektojn sur ĉiuj kontinentoj.

El la elsendo 30.10.2022. Legas Maciek – 1′ 54″