Antaŭ la mikrofono

Mirejo Grosjean el Svislando, lastjare elektita kiel la prezidantino de ILEI prezentas en la interparolo kun nia Redakcio la prioritatojn de sia oficmandato. La interparolo estis surbendig­ita dum la vintra sesio de la Interlingvistikaj Studoj en Poznano. El la elsendo 01.04.2014.

Interparolo kun Geraldo Mattos el Brazilo,  forpasinta la 23-an de marto 2014 devenas el nia arkivo. Ĝi estis surbendigita dum la Universala Kongreso de Esperanto en Zagrebo en la 2001-a jaro. El la elsendo 25.03.2014.

Kun Christine Graissaguel el Francio ni mallonge interparolas retrorigarde al la ĵus finiĝinta Mediteranea E-Semajno okazinta inter la 8-a kaj la 15-a de marto en la provenca Les Issambres. Ĝi jam tradicie ofertas kvar­nivelajn E-kursojn por francaj kaj eksterlandaj esperantistoj en la periodo de florantaj mimozoj. El la elsendo 21.03.2014.

Romano Bolognesi kaj Vito Tornillo el Italio renkontitaj dum la Meditereanea E-Semajno en Les Issambres en la suda Francio informas  i.a. pri la proksimiĝanta 66-a Kongreso de Internacia Fervojista Esperanto-Federacio. Ĝi okazos inter la 17-a kaj la 24-a de majo 2014 en San Benedetto del Tronto, Italio. El la elsendo.18.03.2014.

Humphrey Tonkin el Usono prelegis dum la februara sesio de la Interlingvistitaj Studoj en Pollando. Interalie pri la movado. La problemoj ĉirkaŭ ĝia nuna stato estas ankaŭ la temo de la interparolo. El la elsendo de 14.03.2014.

Fábio Santos el Brazilo kune kun la familio jarŝanĝe de 2013/2014 venis al Bona Espero. Kondukis lin tien la spertoj kaj ideoj de la porpaca Festivalo en kiu Esperanto ludis signifan rolon, kiu en septembro 2013 okazis en Goiânia, Brazilo. El la elsendo 18.02.2014.

Mirejo Grosjean el Svislando – renkontita dum la Interlingvistikaj Studoj en Poznano – interparolas kun ni pri la januara 5-a Afrika E-Kongreso kaj pri la planoj okazigi pliajn E-eventojn sur ĉi tiu kontinento. El la elsendo 11.02.2014.

Humphrey Tonkin estas la tradukinto en la anglan el la E-originalo de la libro de Teodoro S. Ŝvarc, Tivadar Soros “Maskerado ĉirkaŭ la morto”. Pri tiu ĉi traduko kaj alilingvaj tradukoj ni interparolas kun nia antaŭmikrofona gasto antaŭ la lanĉo de la ĉeĥa versio de ĉi tiu libro  en Prago, Ĉeĥio. El la elsendo 07.02.2014.

Birke kaj Bertilo Wennergren post 10-jara foresto koncertis kadre de la riĉa kultura programo de Arkones 2013. Tio estis ankaŭ la okazo renkontiĝi antaŭ nia mikrofono por paroli pri ilia kelkjara estado en Koreio, la laboro de Bertilo pri reeldono de POMEGO kaj lia aktivado en la Akademio de Esperanto, krome  pri ilia komuna muzikado kaj koncertado. Ne mirige,  ke fragmente du kanzonoj el ilia Arkones-koncerto aŭdiĝas komence kaj fine de nia interparolo. El la elsendo 04.02.2014.

Ursula Grattapaglia el Bona Espero daŭrigas en nia antaŭmikrofona renkontiĝo dividi esperojn kaj planojn pri la nuna funkciado de ĉi tiu legendeca centro en Brazilo. El la elsendo 24.01.2014.