Sciencaj informoj

La sanmalfavora influo de alkoholaĵoj je la centra nervosistemo konsumataj longdaŭre kaj grandkvante estas konata kaj rekte proverba. Tamen malgrandaj kvantoj da alkoholaĵoj influante cerbon mildigas inflamprocezojn kaj favoras forigadon de toksaj substancoj, ankaŭ tiuj kiuj ligiĝas kun Alzheimer-malsano. Pri tio informis Maiken Nedergaard gvidanta la neŭromedicinan fakon ĉe University of Rochester (URMC). Pli fruaj esploroj jam elmontris, ke alkoholaĵo malgrandkvante bone efikas je sano malgrandigante riskon de malsanoj de la korangia sistemo kaj de kelkiuj tumoroj. La esploroj de profesorino Nedergaard  koncernis ĉefe gliajn ĉelojn, kiuj okupiĝas pri la forigado de toksaj substancoj el la cerbo kaj pri la provizado de neŭronoj per nutroelementoj kaj proteinoj. Tiuj esplorrezultoj estis publikigitaj la unuan fojon en 2012.  Kiel elmontris nun sciencistoj el University of Rochester gliaj ĉeloj estas plej aktivaj dum dormo. La fizikaj ekzercoj altigas ilian funkciefikecon. La novaj esploroj estis efektivigitaj ĉe musoj, ĉe kiuj sub la influo de granda kvanto da alkoholo (unu kaj duona gramoj je ĉiu korpokilogramo) estis konstatitaj simptomoj karakterizaj por inflamprocezoj, malaltigo de kognokapablo kaj movkapablo. Musoj modere konsumantaj alkoholon (duona gramo je ĉiu korpokilogramo) havis malpli altajn simptomojn karakterizajn por inflamprocezoj. Ilia sistemo pli efike forigadis toksajn substancojn ol ĉe la musoj el la kontrola grupo ne traktitaj per alkoholaĵo. La kogno- kaj mov-kapabloj estis la samaj. Ĝenerale do, malaltkvanta kaj modera konsumado de alkoholaĵoj malgrandigas la demencoriskon, dum ofta kaj longdaŭra drinkado influas limige la kognokapablojn.

El la elsendo 13.03.2018. Legas Tomek kaj Barbara – 2’08”

sc_tm_bp_Sciencistoj_pozitive_pi_negrandaj_vinkvantoj_02’08”.mp3; filename_=UTF-8”sc_tm_bp_Sciencistoj pozitive pi negrandaj vinkvantoj_0208

Leporo apartenas al la bazaj specioj de etdimensiaj animaloj en Pollando vivante ĉefe sur la terenoj de agrikultura kultivado, herbejoj, junarbaroj. Bedaŭrinde en la lastaj jardekoj ilia nombro signife malkreskis. Se en 1978 oni taksis ilian populacion je ĉ. 2,4 milionoj da ekzempleroj, komence de la 90-aj jaroj estis jam je duono malpli. En 2010 la populacio de leporoj malkreskis ĝis ĉ. 540 mil ekzempleroj. Inter la kaŭzoj de ĉi tiu aferstato oni mencias plantprotektajn kemiaĵojn venenajn por la animaloj, kreskon de la nombro de vulpoj rilate kiujn funkcias protektoprogramo. De kelkaj jaroj apartan programon revenigi leporojn al la naturo realigas la lublina vojevodio en la orienta Pollando. En la periodo 2010-2017 preskaŭ du mil leporoj, aĉetitaj de bredistoj kaj adaptitaj al la vivo lbere revenis al la naturaj vivkondiĉoj. La programon gvidas la loka administracio kunlabore kun arbaristoj, ĉasistoj kaj sciencistoj. Leporoj estas aĉetataj de bredistoj aŭtune kaj lokataj sur speciale baritaj surfacoj, kiuj protektas ilin kontraŭ la rabobestoj. Zorgas pri ili forstistoj aŭ ĉasistoj el ĉasistaj rondoj kaj ilian sanstaton monitoras bestokuracistoj. Leporoj pretaj al memstara vivo printempe estas lasataj libere. Sur la surfacoj ĉirkaŭprenitaj per la programo validas malpermeso ĉasi leporojn  kaj ĉasistoj okupiĝas pri redukto de la rabobestoj. Laŭ la Cefa Statistika Oficejo en 2016 en la lublina vojevodio la nombro de leporoj kreskis ĝis pli ol 88 mil ekzempleroj, kio signifas ke je ĉiu 100 hektaroj kalkuliĝas preskaŭ 5 bestoj. Tamen laŭ specialistoj, por ke la populacio povu funkcii memstare, sur tiu areo devus vivi pli ol 12 leporoj. La programo estas daŭrigata.

El la elsendo 13.03.2018. Legas Tomek kaj Barbara – 2’11”

Orcinoj estas eksterordinare interligentaj maraj mamuloj vivantaj en plurgeneraciaj grupoj de 5 ĝis 40 individuoj, kiujn gvidas la plej aĝa kaj plej spertoplena femalo. Post ŝia morto la grupoj malkomponiĝas je malpli grandaj en kiuj la gvidadon transprenas la filinoj de la mortinta gvidantino. Ĉiu el la grupoj havas la propran komunikstilon, kiun esploristoj difinas kiel dialektojn. Sed evidentiĝas, ke la orcina imittalento povas superi la limojn de la propra komuniksistemo. Internacia sciencista kolektivo publikigis informojn pri interesaj eksperimentoj koncerne ilian lernadon kaj imitadon de homaj sonoj. La 14-jara orcino Wikie vivanta en la akvario Marineland en Antibes en Francio kapablas imiti la homan parolon. Dank’ al la sciencistaj klopodoj Wikie kapablas elparoli – tenante la kapon super la akvolustro – la salutojn „hello” kaj „bye bye”, numeralojn de unu ĝis tri kaj la nomon de sia prizorgantino Amy. La eksperimento levas la demandojn pri la inteligenteco de mamuloj kaj ilia kapablo lerni. Jam pli frue al ĉi-specaj eksperimentoj estis subigitaj elefanto kaj belugo.

El la elsendo 06.03.2018. Legas Barbara – 1’33”

sc_bp_Orcino_Wiki_imitas_la_homan_parolon_01’33”.mp3; filename_=UTF-8”sc_bp_Orcino Wiki imitas la homan parolon_0133

Sciencistoj el la Lodza Politekniko prilaboris agroteksaĵon, kiu dank’ al enhavo de biopolimeraj konsisteroj signife rapidigas plantokreskon. Ĝi samtempe „spiras”, kio signifas, ke povas traiĝi tra ĝi akvo kaj fluidaj sterkoj. Ĝia aldona avantaĝo estas la fakto, ke ĝi ne influas negative la medion kaj estas biodetruebla. La teksaĵo kun la nomo BioEcoFab povas esti aplikata en agrikulturo, hortikulturo, florkultivado, primastrumado de la urbaj, montaraj areoj vojkonstruado. La teksaĵo estis testita en laboratoriaj kondiĉoj en kontrolaj esplorcentroj laŭ la vidpunkto de la plantado de floroj, legomoj kaj fruktoj, sportaj-ripozigaj herborulaĵoj, malfacile primastrumeblaj altmontaj terenoj kaj grundniveligaj vojlaboroj. Oni antaŭvidas, ke dum la plej proksimaj jaroj la agroteksaĵo aperos sur la merkato. Nun daŭras esploroj pri ĝiaj novaj specoj.

El la elsendo 06.03.2018. Legas Tomek – 0’59”

sc_tm_Pola_agrikultura_bioteksajo_0’59”.mp3; filename_=UTF-8”sc_tm_Pola agrikultura bioteksajo_059

La regula ŝtupargrimpado estas bona rimedo por lertigi la funkciadon de la korangia sistemo, inkluzive malaltigon de la alta sangopremo kaj fortikigon de la piedmuskoloj. Sciencistoj rekomendas tion aparte al virinoj post menopaŭzo, klarigante, ke elekto  de la fizika aktivado por virinoj tiuvivperiode estas malfacila. Unuflanke malinstige efikas ofte monomanko, foresto de najbara sporta centro, malbona vetero kaj eĉ hontemo. Aliflanke unu el la kaŭzoj ligiĝas kun fiziologio. Nome fortikigaj ekzercoj, ekzemple kun la uzo de halteroj, helpas konservi la muskolomason, sed grandigas la riskon de hipertensio ĉe  mezaĝuloj aŭ personoj jam ĝin suferantaj. Ligo de ĉi-specaj ekzercoj kun streĉo rapidiganta la pulson, dank’ al kio la muskoloj estas provizataj per sango riĉa je oksigeno, ebligas minumumigi tiun riskon. La simpla ŝtupargrimpado ebligas ligi ambaŭ specojn de la trejnado helpante forigi la grasohiston, plibonigi la kolesterolostrukturon kaj malaltigi la riskon de osteoroporozo. Ĝi kostas nenion kaj eblas ĝin praktiki diskrete. Pri la efikeco de ĉi-speca ŝtupargrimpa trejnado informis la periodaĵo dediĉita al problemoj ligitaj kun menopaŭzo. Raportis pri tio internacia sciencista kolektivo ekzameninte grupon de koreaninoj, kiuj ĉiutage grimpis 192 ŝtupojn du ĝis kvin fojojn. Ĉe ĉiuj estis konstatita pliboniĝo de la sanstato. La trejnado rezultigis malgrandigon de la minaca arteriskleroto kaj malaltigon de la sangotensio ĉe virinoj suferantaj hipertension. Pliboniĝis ankaŭ la muskoloforto de iliaj piedoj.

El la elsendo 27.02.2018. Legas Tomek – 1’48”

sc_tm_saniga_efiko_de_stupargrimpado_01’48”.mp3; filename_=UTF-8”sc_tm_saniga efiko de stupargrimpado_0148

La restaĵoj de grandegaj, devoniepokaj plakodermaj fiŝoj estis malkovritaj en la loko Płucki en la komunumo Łagów (en la suda Pollando). Temas pri dunkleosteoj apartenintaj al la plej grandaj maraj rabobestoj en la historio de la Tero. La ĵusa malkovro en Płucki, la unua en Eŭropo kronis la 20-jarajn paleontogiajn esplorojn en la troviĝanta en la Sanktakruca Montaro komunumo. Oni malkovris tie restaĵojn de tri diversdimensiaj dunkleosteoj. La kapo de la plej granda longis 60 centimetrojn kaj la tuta fiŝo havis 6-7 metrojn. La plej kompleta estas la 5-metra dunkleosteo, kiu konserviĝis 40-procente. La restaĵoj estas taksataj je ĉirkaŭ 370 milionoj da jaroj. La devoniepokaj plakodermaj fiŝoj apartenis al la plej grandaj maraj raboanimaloj, la unuaj vertebruloj, kiuj atingis grandan dimension, ektroviĝinte pinte de la nutropiramido en la devoniepoka maro. Ili ne havis dentojn. Ties funkciojn plenumis specialaj memakriĝantaj makzelakraĵoj. Iliaj makzelostoj dum ĉiu malfermo aŭ fermo de la faŭko interfrotiĝadis akriĝante kvazaŭ tranĉiloj. La komunumestro de Łagów  planas utiligi la malkovron por disvastigi konojn pri la regiono. Unu el la ideoj estas krei didaktitan itineron, krome establi lokon, en kiu eblos prezenti eksponaĵojn ligitajn kun dunkleosteoj kaj aliajn geologiajn trezorojn malkovritajn sur la tereno de la komunumo. La restaĵoj de la devoniepkaj fiŝoj malkovritaj en Płucki eblos rigardi fine de februaro en porokaza ekspozicio en la Geologia Muzeo de Varsovio.

El la elsendo 20.02.2018. Legas Tomek – 1’46”

sc_tm_Devoniepokaj_fisoj_en_Pollando_01’46”.mp3; filename_=UTF-8”sc_tm_Devoniepokaj fisoj en Pollando_0146

Konforme al la analizo de 44 efektivigitaj esploroj rezultas, ke ne la grandaĝo, sed la postoperaciaj komplikaĵoj influas la sanstaton de pacientoj. Specialistoj el Toronto-universitato analizis la postoperaciajn komplikaĵojn de preskaŭ 13 mil pacientoj kaj konstatis, ke komplikaĵoj aperas ĉe ĉiu kvara operaciita senjoro. Sed ne la aĝo havas la signifon en la prognozado de komplikaĵoriskoj, sed la sanstato de la paciento. Persono grandaĝa, sed fizike malaktiva suferanta demencon, depresion kaj aldone fumanta estas duoble pli elmetita je la risko de la postoperaciaj komplikaĵoj. La ĉefaŭtoro de metaanalizo,  d-rino Jennifer Watt el University of Toronto asertas, ke la aĝo indikas sole,  kiom longe vivas koncerna persono – dum la plej grava estas ties fizika lerteco kaj foresto de kognoperturboj. La febleco kaj demenco kaŭzas, ke ĉe la altaĝaj personoj pli ofte okazas postoperacie infektiĝoj, aparte pulmoinflamo kaj sangokoagulaĵoj minacantaj per cerba infarkto kaj pulmoembolio. Tiuj personoj devas esti longdaŭre enhospitaligitaj kaj post la hospitala kuracado postulas pluestadon en alia protektocentro aŭ domo. Tio ne signifas, ke la aĝaj personoj suferantaj demencon aŭ fizikan malforteceon ne povas esti operaciataj, kvankam ĉiuj ĉi-rilataj decidoj devas  esti alprenataj individue. Kaze de kormalsanoj al pacientoj anstataŭ koroperacioj eblas oferti procedojn malmulte invadajn, kutime malpli riskajn. Sed eĉ operacioj ĉe la koro estis en la lastaj jaroj tiom perfektigitaj, ke sekure eblas ilin efektivigi ĉe personoj inter la 80-a kaj 90-a vivojaroj. Unu el la plej maljunaj pacientoj operaciita en la Centro de Kormalsanoj en la loko Zabrze (la suda Pollando) havis 98 jarojn.

El la elsendo 13.02.2018. Legas Tomek – 2’03”

sc_tm_Kio_kauzas_la_postoperaciajn_komplikajojn_02’03”.mp3; filename_=UTF-8”sc_tm_Kio kauzas la postoperaciajn komplikajojn_0203

La medicinaj hirudoj el la bredejo en Opole (la suda Pollando) estis utiligitaj dum la sciencaj esploroj de la kosma misio ICAres-1. Estonte ili povos medicine servi al partoprenantoj de pliaj  kosmaj misioj. En ICAres-1 (Innovative Concepts Ares) temis pri simulita misio al Marso, efektivigita sur la tereno de la unusola en Eŭropo, speciala >stacio habitat< Lunares en la loko Piła kun la partopreno de sciencistoj el Pollando, Francio kaj Germanio. Ĝia celo estis i.a. sciencaj eksperimentoj en kondiĉoj proksimaj al tiuj, kiuj povas regi sur la tereno de la kosmaj stacioj en la kondiĉoj de mikrogravitado. La medicina parto de la misio  estis aŭspiciita de la Medicina Universitato en Poznano kadre de ĝia novkreita Laborejo de Ekstrema Medicino. Dum la simulado helpe de specialaj aranĝaĵoj oni klopodis rekrei kondiĉojn en la kosmaj stacioj sur Marso kaj la Luno. Temis pri reprezentantoj de la tera faŭno kaj flaŭro, virtualaj partneroj de kosmonaŭtoj dum iliaj veturoj ekseter la Teron. Evidentiĝis, ke lumbrikoj kaj plantoj ne ŝatas polvon de meteoritoj dum muŝoj kaj hirudoj ne havis la problemojn en tiuj ĉi kondiĉoj generi. Oni asertas, ke hirudoj en longdaŭraj flugmisioj povas plenumi diversajn rolojn ligitajn kun senmoviĝo en malvasta spaco dum plurmonataj veturoj. Laŭ Maria Mroczko de jaroj bredanta hirudojn en Namysłowice, liverinta ilin al la misio ICAres-1 la apliko de hirudoj,  kiel medicina rimedo ne mirigas, ĉar temas pri vera fabriko de komplikaj kemiaj strukturoj. Ĝis nun estis esploritaj 120 el ili. La partopreno en la kosma programo povas helpi al la specio „hirudo medicinalis” esti agnoskita kiel specio minacita de formorto. La interesiĝo pri polaj hirudoj venanta el la tuta mondo superas la bredoeblojn, kiuj ĉirkaŭprenas 50 mil hirudojn inkluzive de la 8-mila genera grupo,  ĉiujare grandiĝanta.

El la elsendo 06.02.2018. Legas Tomek kaj Gabi – 2’16”

sc_tm_gk_Polaj_hirudoj_servas_al_kosmaj_esploroj_02’16”.mp3; filename_=UTF-8”sc_tm_gk_Polaj hirudoj servas al kosmaj esploroj_0216

La korpremado de suĉinfanoj povas grave influi ilian postan vivon. La lastaj esploroj en la Universitato de Brita Kolombio elmontras, ke tuŝo povas influi sferojn de DNA, ligitajn kun la imuna sistemo kaj metabolo. La daŭro de la korpremado de infano en la beba periodo povas ŝanĝi genekspresion almenaŭ en 5 fragmentoj de ilia DNA. Dum la esploroj estis pruvite, ke suĉinfanoj, kiuj spertis malpli proksiman fizikaj kontakton en la unuaj vivsemajnoj havis en siaj ĉeloj malpli forte evoluintan molekulan profilon. La eksperimenton partoprenis la gepatroj de 94 infanoj, kiuj gvidis taglibron dum 5 semajnoj ekde la naskiĝo de ilia infano. Ili notis kiel kondutas la infanoj, kaj ankaŭ kiom ofte estas tuŝataj kaj korpremataj. En la aĝo de 4-5 jaroj la provaĵoj de DNA de ĉiuj infanoj estis subigitaj al ekzameno. Esploristoj aparte donis la atenton al la metilado de DNA, kiun povas influi eksteraj kondiĉoj, aparte infanaĝe. Evidentiĝis, ke aperas konstantaj diferencoj en DNA-metilado en kvin specifaj lokoj de DNA inter infanoj kun alta kaj malalta nivelo de la fizikaj kontaktoj. Du el ili gravas por la imuna sistemo kaj en metabolo. Estas planitaj pliaj esploroj por profundigi konojn pri la signifo de la fizika kontakto bebaaĝe, aparte kaze de infanoj spertantaj malfacilan situacion.

El la elsendo 30.01.2018. Legas Maciek – 1’39”

sc_mj_La_signifo_de_korpremado_de_sucinfanoj_01’39”.mp3; filename_=UTF-8”sc_mj_La signifo de korpremado de sucinfanoj_0139

Sciencistoj jam antaŭ kelka tempo konstatis, ke en la maroj kaj oceanoj kreiĝas grandegaj akvoturbuladoj kun la diametro egala eĉ ĝis kelkcent kilometroj. Temas pri la tiel nomataj mezoskalaj akvoturbuladoj, kiuj peras longdistance grandegajn kvantojn da akvo kaj varmo. Laŭ matematikaj kalkuloj oni ŝpinis spekulativadojn, ke ili povas aperi pare, sed longe oni parolis pri tio nur teorie. Nun eblis observi ilin pere de satelitoj kaj malkovris tion sciencistoj el Liverpulo. Ili estis rimarkitaj en Tasmana Maro, oriente for de Aŭstralio. Alia ĉi-speca kazo estis notita en la suda Atlantiko ĉe la okcidenta bordo de la Suda Afriko. Laŭ sciencistoj tiuj akvoformacioj povas tre rapide aliloki je grandaj distancoj malgrandajn marajn animalojn. Estis konfirmite, ke la akvoturbuladoj moviĝas laŭ kotraŭaj direktoj, kvankam ili estas  ligitaj. Estis ankaŭ difinite, ke tia para drivado de akvoturbuladoj povas daŭri eĉ 6 monatojn. Se la unuopaj mezoskalaj akvoturbuladoj preskaŭ ĉiam direktiĝas okcidenten,  la paraj akvoturbuladoj kapablas moviĝi orienten kun rapideco eĉ 10-obla. Ilia influo je la tera klimato ne estas ankoraŭ difinita, sed kiel asertite ĝi tutcerte ekzistas, ĉar moviĝanta varmo influas la atmosferan cirkuladon.

El la elsendo 30.01.2018. Legas Tomek- 1’31”