Antaŭ la mikrofono

Hodiaŭ antaŭ nia mikrofono gastas Geoffrey Greatrex, la prezidanto de la Kanada E-Asocio, kun kiu ni parolas pri la movado en la lando de la pasintjara UK, krome pri liaj profesiaj taskoj kaj la traduko i.a. en Esperanton el la malnovgreka de historio de militoj de Prokopio de Cezareo.

Interparolis red. Barbara Pietrzak

El la elsendo 20.10.2023 – 10′ 14″

Al la temo de la Biblioteko Hodler, nun troviĝanta sub la protekto de la Pola Nacia Biblioteko en Varsovio referencas nia interparolo kun d-ro Mark Fettes. Unu el la ĉefideodonintoj de ĉi tiu entrepreno kompletigas niajn ĝisnunajn informojn per kelkaj nekonataj preparfacetoj al ĉi tiu entrepreno.

Interparolis red. Barbara Pietrzak

El la elsendo 15.10.2023 – 08′ 10″

La 108-a UK en Torino estis la okazo gastigi antaŭ nia mikrofono konatan E-historiiston, d-ron Ulrich Lins kaj intervjui lin pri liaj aktualaj laboroj. Ili ligiĝas kun laboro pri faka artikolo por eksterkomunuma revuo pri iu
faceto en historio de E-movado. Ĝi estas ligita kun du esperantistaj figuroj junaĝe ankaŭ komunistaj aktivuloj: Kurisu Kei el Japanio kaj Nikola Aleksjev el Bulgario.

Interparolis red. Barbara Pietrzak

El la elsendo 10.10.2023 – 14′ 14″

Dum la lasta ARKONES (15-17.09.23) inter multaj partoprenantoj de la evento en Poznano troviĝis ankaŭ Sara Spanò kaj Francesco Maurelli. Koincide dum ĉi tiu semajnfino pasis la sepa datreveno de ilia geedziĝo. Tio estis la okazo por ripeti gratulojn kaj bondezirojn por ilia daŭra kaj feliĉa vivovojo, sed krome retrorigardi por iom paroli pri iliaj komunaj aktivadoj kaj individuaj pasioj.

Interparolis red. Barbara Pietrzak

El la elsendo 30.09.2023 – 11′ 34″

En la antaŭmikorofona renkontiĝo kun nia redakcio, eksa prezidanto de PEJ kaj nun ĝia estrarano Rafał Darasz informas pri la ĝisnuna kaj pliaj planoj de la pola sekcio de TEJO.

Interparolis red. Maciej Jaskot

El la elsendo 25.09.2023 – 09′ 01″

Lunde, la 25-an de septembro kun Fábio Fortes en Brazilo nia redakcio faris rekonviziton ĉe kelkaj vidindaj lokoj en pola ĉefurbo. Nia gasto dividas siajn impresojn pri ĉi tiu vizito en Varsovio kaj pli frua en Krakovo, aparte en la iama germana koncentrejo Auschwitz-Birkenau.

Interparolis red. Barbara Pietrzak

El la elsendo25.09.2023 – 08′ 24″

La 19-an de septembro mortis en Valencio konata hispana movada organizanto kaj E-instruisto, kiu krom en Hispanio (Madrido kaj Valencio) instruis i.a. Esperanton ankaŭ eksterlande i.a. en la E-Studumo de la Monda Turisma Centro en Bydgoszcz, Pollando. En nia sondokumenta omaĝa rememoro ni citas lian saluton, eldiritan kiel la prezidanto de LKK de la Valencia UK 1993 kaj prezentas la redakcian interparolon post la 20-a ARKONES, faritan en 2004.

Interparolis red. Barbara Pietrzak

El la elsendo 20.09.2023 – 14′ 48″

Nia antaŭmikrofona gasto estas prof-o Mark Fettes, kun kiu ni interparolas pri lia lekciado pri la E-Movado dum la aŭtuna – ĵus finiĝinta – sesio de Interlingvistikaj Studoj; pri la divido de la post-prezidaj, post-panemiaj kaj por-planedaj pripensoj dum la 37-a ARKONES, laboroj en CED kaj ESF kaj verkoplanoj.

El la elsendo 15.09.2023 – 11′ 32″

Red. Maciej Jaskot partoprenis la 40-an Kongreson de la Pola E-Asocio en Siedlce. Jen lia sonsceno pri la fermaj momentoj de la Kongreso finiĝinta lastdimanĉe.

Registris red. Maciej Jaskot

El la elsendo 25.07.2023 – 7′ 22″

En Adam-Mickiewicz-Universitato (AMU), en Poznano, finiĝis la unua studjaro de la dujara magistra kurso pri interlingvistiko por internacia studentaro kadre de la fako Lingvistiko kaj Informmastrumado (en la Fakultato pri Modernaj Lingvoj kaj Literaturoj). Pri tiu temo ni interparolas kun profesorino Ilona Koutny. (https://www.youtube.com/watch?v=m-MpZxrNdwk&t=214s)

Interparolis redaktorino Barbara Pietrzak

El la elsendo 15.07.2023 – 12′ 04″