Antaŭ la mikrofono

Romano Bolognesi kaj Vito Tornillo el Italio renkontitaj dum la Meditereanea E-Semajno en Les Issambres en la suda Francio informas  i.a. pri la proksimiĝanta 66-a Kongreso de Internacia Fervojista Esperanto-Federacio. Ĝi okazos inter la 17-a kaj la 24-a de majo 2014 en San Benedetto del Tronto, Italio. El la elsendo.18.03.2014.

Humphrey Tonkin el Usono prelegis dum la februara sesio de la Interlingvistitaj Studoj en Pollando. Interalie pri la movado. La problemoj ĉirkaŭ ĝia nuna stato estas ankaŭ la temo de la interparolo. El la elsendo de 14.03.2014.

Fábio Santos el Brazilo kune kun la familio jarŝanĝe de 2013/2014 venis al Bona Espero. Kondukis lin tien la spertoj kaj ideoj de la porpaca Festivalo en kiu Esperanto ludis signifan rolon, kiu en septembro 2013 okazis en Goiânia, Brazilo. El la elsendo 18.02.2014.

Mirejo Grosjean el Svislando – renkontita dum la Interlingvistikaj Studoj en Poznano – interparolas kun ni pri la januara 5-a Afrika E-Kongreso kaj pri la planoj okazigi pliajn E-eventojn sur ĉi tiu kontinento. El la elsendo 11.02.2014.

Humphrey Tonkin estas la tradukinto en la anglan el la E-originalo de la libro de Teodoro S. Ŝvarc, Tivadar Soros “Maskerado ĉirkaŭ la morto”. Pri tiu ĉi traduko kaj alilingvaj tradukoj ni interparolas kun nia antaŭmikrofona gasto antaŭ la lanĉo de la ĉeĥa versio de ĉi tiu libro  en Prago, Ĉeĥio. El la elsendo 07.02.2014.

Birke kaj Bertilo Wennergren post 10-jara foresto koncertis kadre de la riĉa kultura programo de Arkones 2013. Tio estis ankaŭ la okazo renkontiĝi antaŭ nia mikrofono por paroli pri ilia kelkjara estado en Koreio, la laboro de Bertilo pri reeldono de POMEGO kaj lia aktivado en la Akademio de Esperanto, krome  pri ilia komuna muzikado kaj koncertado. Ne mirige,  ke fragmente du kanzonoj el ilia Arkones-koncerto aŭdiĝas komence kaj fine de nia interparolo. El la elsendo 04.02.2014.

Ursula Grattapaglia el Bona Espero daŭrigas en nia antaŭmikrofona renkontiĝo dividi esperojn kaj planojn pri la nuna funkciado de ĉi tiu legendeca centro en Brazilo. El la elsendo 24.01.2014.

La renkontiĝo de Barbara kun Ursula Grattapaglia jarŝanĝe en Bona Espero, Brazilo estis la okazo ne sole gratuli pro laŭvicaj distingoj, kiujn ge-roj Grattapaglia ricevis pro sia grava socia, ekologia laboro pere de Esperanto, sed ankaŭ ekscii pri novaj planoj. Temas pri la unua parto de iom ampleksa interparolo. El la elsendo 21.01.2014.

Birute Rozenfelde el Latvio estas unu el la  plej novaj Honoraj Membroj de UEA. La antaŭmikrofona renkontiĝo dum la Universala Kongreso en Rejkjaviko estis la okazo gratuli pro ĉi tiu distingo kaj ekscii pri la komenco kaj la nuno de la Baltiaj E-Tagoj, iam Baltaj E-Tendaroj, pri la E-agado de nia interparolantino. El la elsendo 07.01.2014.

Frank Selten el Germanio al multaj aŭskultanoj de niaj elsendoj estas jam iom konata i.a. pro la pli frue aŭdiĝintaj interparoloj. En la lasta, registrita en Rejkjaviko  kvankam ni memorigas kelkajn rilatajn E-informojn el lia biografio ni koncentriĝas pri lia kariero de ĵazmuzikisto, kiu en 2013 solenis sian 50-jariĝon tiuterene dum la bando kun kiu li estas ligita de la komenco Barrelhouse solenis samjare sian 60-jariĝon. El la elsendo 03.01.2014.