Podkasto: Ludu en nova fenestro | Elŝutu
La 1132-a E_elsendo el la 04.01.2022 ĉe www.pola-retradio.org
En nia unua elsendo de la Nova Jaro per aparta felietono ni referencas al la komenciĝanta 2022, kiel Jubilea Jaro de la Esperanta Radio, E-Radiofonio. Antaŭ 100 jaroj en 1922 aŭdiĝis la unuj E-radioelsendoj, kiuj ekigis gravegan paroligan rolon por miloj da esperantistoj tra la mondo, kiu misio ne ĉesis. La komencaj aktualaĵoj rilatas al la prezidanteco de Pollando en Organizaĵo por Sekureco kaj Kunlaboro en Eŭropo, al brazila leĝo malpermesanta orminadon en la regiono de la t.n. pluvarbaroj, pri proksimiĝanta Epifania Parado i.a. en Varsovio, al Tarnów, laŭ CNN unu el la plej belaj inter mezkonataj urboj. Nia scienca temo estas dediĉita al NASA-esploroj pri tio, kiel ni reagus je konstato pri ekzisto de ekstertera vivo kun partopreno de reprezentantoj de grandaj religioj. Muzike ni memorigis la kanzonon pri „Novjara nokto” de Bronstein/Asorti. La programinformon akompanas foto pri radioaparatoj el la jaroj 1925-1929. En unuopaj rubrikoj de nia paĝo eblas konsulti la paralele legeblajn kaj aŭskulteblajn tekstojn el niaj elsendoj, kio estas tradicio de nia Redakcio ekde 2003-a jaro. La tuta elsendo estas aŭdebla ĉe la kanalo: https://www.youtube.com/results?q=pola+retradio&sp=CAI%253D I.a. pere de jutubo, konforme al individua bezono, eblas rapidigi aŭ malrapidigi la parolritmon de la sondokumentoj, transsalti al iu serĉata fragmento de la elsendo.
Kvankkam mi tre tre malofte reagas, mi auxskultas vin regule. Surprizis min la fakto, ke jam en 1922 komencis radioelsendoj en Esperanto. Tiajn elsendojn mi pritraktas tre gravaj. Mi donis miajn unuajn pasxojn en Esperanto pere de radio. Kiel cxiam dauxra fervora auxskultanto de radielsendoj en Esperanto, mi revas pri ekstaro de esperanta radiostacio kun rektaj parolistoj, senperaj programeroj, teknike ebliganta kaj instiganta la enprogramigon de la auxskultantaraj reagoj. Kompreneble, tio ne estas facile realigebla!
Mi esperas, ke vi revenu denove al la jubileo.
Joaquim
Vivu la esperanta radiofonio!
Kune kun Nova Jaro venas Nova Kvizo kun plej bonaj deziroj por 2022! <3
1. Kiun jubileon ni festos ĉi-jare? a) 200an naskiĝtagon de Ludoviko Pasteur, b) 100- jariĝon de Esperanto-radiofonio, c) 150an naskiĝtagon de Jan Szczepanik (Ŝĉepanik)
2. Kun kiuj landoj Pollando kunprezidos en Organizaĵo por Sekureco kaj Kunlaboro en Eŭropo? a) Danio kaj Serbio, b) Svedio kaj Norda Makedonio, c) Norvegio kaj Montenegro
3. En kiu sudamerika lando ne eblos ekspluati oron en la pluvarbaro? a) Brazilo, b) Kolombio, c) Venezuelo
4. Kion signifas "epifanio"? a) Festotago de Tri Reĝoj, b) Verko de Mikelanĝelo, c) Enkarniĝo de Dio kiel Jesuo
5. Kiuj religioj pretus akcepti eksterterulojn? a) kristanismo, b) judaismo, c) islamo