La nekropolo Malnova Powązki-Tombejo en Varsovio formas eksterordinaran spacon, kiu dokumentas la arton, lingvon, kulturon kaj tradicion de multaj generacioj. Monumentecaj sarkofagoj, kapeletoj, skulptaĵoj, tomboŝtonoj kaj tomboskulptaĵoj estas verko de elstaraj artistoj – arkitektoj kaj skulptistoj. Unu el la ŝlosilaj taskoj de la Fondaĵo Malnova Powązki-Tombejo restas protektado kaj konservado de ĉi tiu heredaĵo. Laŭ ĝiaj lastaj informoj komenciĝis plia etapo de laboroj pri ciferecaj 3D-modeloj de la historiaj objektoj. Tio ebligos vastigi la kolekton, kiu jam troviĝas en la retejo de la fondaĵo: fundacja.starepowazki.pl/skany-3d. Nun, per novaj skanaĵoj estos ĉirkaŭprenitaj same monumentoj kun aparta valoro historia, kiel ankaŭ objektoj gravaj en la kunteksto de la historio de ĉi tiu loko. Dank’ al tio virtuala promeno tra la Malnova Powązki-Tombejo estos pli ampleksa kaj pli vaste alirebla al la publiko, same al artamantoj kiel ankaŭ al personoj, kiuj ne povas viziti la lokon persone. En la lastaj jaroj kreiĝis speciala apo kaj eduk-pupitroj funkciantaj sur la tereno de la nekropolo. Nun dank’ al 3D-modeloj vastiĝos ĉi tiu eduka kaj dokumenta spaco.
El la elsendo 30.10.2026. Legas Gabi – 01′ 45″
