Nur du semajnoj restas ĝis inaŭguro de la muzeo de Igor Mitoraj, la 6-an de junio, en la toskana Pietrasanta. La unua en la mondo muzeo dediĉita al pola skulptisto kreiĝis en la adaptita komerca halego el la 60-aj jaroj. La vitrumita pavilono troviĝas en la proksimeco de la historia centro de la urbeto, difinata kiel malgranda Ateno – pro firma ĉeesto de artistoj kaj skulptistoj kaj proksime al la fama minejo de la Karara marmoro. La muzeo ne nur omaĝas la artiston mortintan antaŭ 12 jaroj, sed reliefigas liajn fortajn ligojn kun la loko, kiu fariĝis por li spaco de laboro, inspiro kaj krea evoluo.
La muzeo rolos kiel moderna centro de la nuntempa arto koncentriĝanta pri esploroj, eksperimentado kaj dialogo inter diversaj artaj formoj. La nova muzeo firmigas la internacian pozicion de Pietrasanta kaj aldone akcentas ĝian rolon sur la mapo de la eŭropa kulturo.
La naskiĝinta en 1944 artisto estas aŭtoro de mondkonataj monumentecaj skulptaĵoj. Li studis pentroarton ĉe Tadeusz Kantor en Krakovo. La veturo al Meksiko kaŭzis ŝanĝon de liaj artaj interesiĝoj kaj enamiĝon al la skulptado. Mitoraj laboris sekve i.a. en Parizo, sed sian ĉefan laborejon li kreis en Pietrasanta, en kiu li pasigis kelkdek jarojn. Unu el la plej karakterizaj trajtoj de lia kreado estas skulptaĵoj prezentantaj fragmentojn de la homa korpo – kapoj, trunkoj kaj maskoj – konscie en sia formo damaĝitaj kun fendoj aŭ mankantaj elementoj. Mitoraj inspirite de la antikva arto tiamaniere prezentis fragilecon kaj mankojn de homo, kaŝitajn sub ideala, klasika beleco.
El la elsendo 20.05.2026. Legas Gabi – 02′ 23″
