Podkasto: Ludu en nova fenestro | Elŝutu
En la 1266-a E_elsendo el la 20.08.2023 ĉe www.pola-retradio.org:
• En sondokumenta parto rilata al la 108-a UK en Torino ni prezentas sonscenon el la aŭtora koncerto de Grazia Barboni kaj ŝian plenumon de la kanzono de Édith Piaf kun la E-aj kaj francaj vortoj „La vivo en rozoj”. Profesoro Humphrey Tonkin proksimigas al ni du verkojn kun sia kontribuo, kiujn li prezentis dum la kongresaj Aŭtoraj Duonhoroj.
• Komence ni informas pri la programo „Revenoj” celita al poldevenaj sciencistoj eksterlande revenantaj al Pollando; pri ĉ. 100 pomujoj plantitaj de japanaj junuloj el Tsuruga en Varsovio.
• Nia scienca temo rilatas al minirobotoj estonte funkciontaj ankaŭ en la homa organismo.
• La interreta foto akompananta la programinformon prezentas la itallingvan publikan afiŝon de la 108-a UK en Torino, kiu reklamas ĝin kiel Festivalon de la Esperantista Kulturo.
• En unuopaj rubrikoj de nia paĝo eblas konsulti la paralele legeblajn kaj aŭdeblajn tekstojn el niaj elsendoj, kio estas tradicio de nia Redakcio ekde 2003. La elsendo estas aŭdebla en jutubo ĉe la adreso: https://www.youtube.com/results?q=pola+retradio&sp=CAI%253D I.a. pere de jutubo, konforme al individua bezono, eblas rapidigi aŭ malrapidigi la parolritmon de la sondokumentoj, transsalti al iu serĉata fragmento de la elsendo.
La elsendo kaptis mian specialan atenton pro ĝia interesa kaj varia enhavo. Revenoj de poldevenaj distingiĝantaj esploristoj al hejmlando ĝojigas. La rakonto de prof. H.Tonkin pri Clarence Bicknell inspiras koniĝi pli vaste pri tiu elstara esperantisto kaj ties muzeo-librejo en la itala Bordighera. Aŭskultinda estas la programero kiel Japanio en la jaroj 1920-1922 savadis polajn infanojn el Rusio ĉirkaŭprenita per revolucio kaj civitana milito. Tio estis la unua en historio agado de Japana Ruĝa Kruco por fremda lando. La kanzono de Édith Piaf en la plenumo de Grazia Barboni beligis vian elsendon. Dankon.