La orbitaj observadoj helpe de la apatenanta al Eŭropa Kosma Agentejo sondilo ExoMars Trace Gas Orbiter sugestas, ke sub Valles Marineris, kiun formas sistemo de kanjonoj situantaj iom sudoriente de la Marsa ekvatoro troviĝas abundaj akvoprovizoj. Tio estas la plej granda kanjono en la Sunsistemo. Ĝi longas ĉirkaŭ kvin mil kilometrojn, vastas ĉirkaŭ 200 kilometrojn kaj ĝia profundo kelkloke atingas 11 kilometrojn. Delonge estas sciate, ke sur la Marso troviĝas akvo. Tamen en plimulto – laŭ nia scio – ĝi troviĝas en la malvarmaj, polusaj regionoj de la planedo kaj havas formon de glacio. Novaj esploroj elmontras tamen, ke akvo sur la Marso troviĝas ne sole tie, sed ankaŭ proksime de la ekvatoro. Tion oni eksciis dank’ al la instrumento FREND troviĝanta sur la ferdeko de la sondilo. Ĝi malkovris en la kanjona sistemo spacon kun granda kvanto de hidrogeno. Premisante, ke hidrogeno estas ligita kun akvomolekuloj, eblas konstati ke eĉ 40 procentoj de la subkrusta materialo ŝajnas esti akvo. Tiu akvoriĉa regiono, kies profundo atingas ĝis unu metro havas la grandecon de Nederlando. Laŭ sciencistoj tiu regiono ŝajnas promesoplena por plia serĉado de akvo sur la Marso. La ĝisnunaj marsaj misioj serĉis jam akvon sed sur la surfaco de la planedo, trovante ĝin tie en malgradaj kvantoj. Nun estas necesaj pliaj esploroj por detale difini kondiĉojn regantajn en la kanjona regiono, rekoni formon, en kiu la akvo tie aperas. La plej nova malkovro en la kunteksto de la estontaj misioj al la Marso kun la partopreno de homoj igas la regionon de kanjonoj ankoraŭ pli ekscita kaj promesoplena.
El la elsendo 21.12.2021. Legas Barbara – 2′ 20″
