Memormuzeo pri Siberiekziloj en Bjalistoko plian fojon ektroviĝis en elita grupo de la plej bonaj muzeaj institucioj en Eŭropo. La 10-an de oktobro 2025, dum speciala ceremonio en Trebinje, Bosnio kaj Hercegovino ĝi ricevis Specialan Distingon pro la kreemo kadre de la prestiĝa premio Živa. Per la nomo Živa la premio referencas al la slava diino de vivo, vivanteco kaj fekundeco, kaj spegulas la ideon de vivigo kaj promocio de la kultura heredaĵo. Ĉi tiu premio, lanĉita de la Forumo de Slavaj Kulturoj, apartenas al la plej prestiĝaj muzeaj distingoj en Eŭropo. Ekde 2014 ĝi estas atribuata al la plej bonaj muzejoj kaj objektoj de la kultura heredaĵo en la slavaj landoj.
La plej nova projekto de la bjalistoka Memormuzeo pri Siberiekziloj estas ekspozicio kun universala mesaĝo „Siberio – malliberejo de nacioj”. Ĝi bildigas tragikajn sortojn de diversaj nacioj, kiujn tuŝis la sovetunia sistemo de reprezalioj, ĝi reliefigas spertojn de multaj landoj kaj kulturoj. La ekspozicio konsistas el paneloj kun tekstoj kaj fotoj, kaj depende de la prezentoloko kompletigos ĝin kongruaj kun ĝi elementoj. La ekspozicion akompanas kelklingva interreta paĝo, kiu vastigas alireblecon kaj atrakciecon de la ekspozicio por diverslandaj spektantoj. Ĝi estos prezentata en ĉiuj kontinentoj, reliefigante la rolon de Bjalistoko kiel urbo de dialogo kaj kunlaboro.
El la elsendo 25.11.2025. Legas Gabi – 02′ 02″
